هي نظريو ’ڪوستاس ميلاڪوپائيڊس‘ (Costas Melakopides) نالي ڪئنيڊيائي دانش ور پنهنجي ڪتاب ”ڪئنيڊيائي پرڏيهي نيتي 1945ع کان 1995ع “ ۾ ”ڪئنڊيائي بين الاقواميت“واري تصور کي واضح ڪرڻ لاءِ ڪتب آندو آهي. جنهن ۾ ٻُڌايو ويو آهي ته ڪيئن دُنيا جي ٻين وچٿرين طاقتن (Middle Power) ]جهڙوڪ: آسٽريليا، نيوزي لينڊ، سويڊن، ڊينمارڪ ناروي وغيره[ سان گڏجي ”سرد جنگ“ دوران، سياسي حقيقت پسنديءَ جو مظاهرو ڪندي، بين الاقوامي تعلقات جي حوالي سان ڪئنيڊا پنهنجي پرڏيهي پاليسيءَ ۾ ثالثي، وچٿرائپ، بين الاقوامي تڪرارن ۾ سفارتي ۽ قانوني نُڪتن جي خيال، امن پسنديءَ سان واڳنا، امن جي قيام، انساني حقن، پرڏيهي امداد ۽ ماحولياتي فضيلت وارن اصولن کي لاڳو ڪندي، هڪ مُهذب بين الاقوامي معاشري جي قيام لاءِ جُستجو ڪئي. ان دوران ڪيترن موقعن تي ڪئنيڊيائي سرڪار پنهنجن روايتي اتحادين جي فرمائشن کي مڃڻ کان به انڪار ڪري ڇڏيو. اڄوڪي دور ۾ يورپي يونين سميت دُنيا جا ڪيترائي مُلڪ، عالمي معاملن ۾ ”عمليت پسند آدرش واد“ جي مٿي بيان ڪيل اصولن ۽ قدرن تي عمل ڪري، پنهنجون پرڏيهي پاليسيون ترتيب ڏيندي، دُنيا ۾ تعاون ۽ سهپ لاءِ بهتر ماحول جي فراهميءَ ۾ پنهنجو ڪردار ادا ڪري رهيا آهن